Cristiano Ronaldo dhe Lionel Messi kanë pësuar një rënie të ndjeshme të numrit të ndjekësve në Instagram, duke humbur miliona followers vetëm brenda pak orësh.
Megjithatë, sipas raportimeve, kjo nuk lidhet me ndonjë polemikë apo reagim negativ nga fansat, por me një operacion të gjerë pastrimi të kryer nga Instagram ndaj llogarive të rreme, profileve joaktive dhe bot-eve në platformë.
Të dhënat nga faqet që monitorojnë statistikat e rrjeteve sociale tregojnë se Ronaldo humbi mbi tetë milionë ndjekës, duke zbritur nga 674 milionë në rreth 666 milionë followers.
Ndërkohë, Messi humbi më shumë se pesë milionë ndjekës, pasi profili i tij ra nga 512 milionë në rreth 507 milionë ndjekës.
Pavarësisht kësaj rënieje të konsiderueshme, dy superyllët e futbollit vazhdojnë të mbeten ndër personat më të ndjekur në botë në Instagram.
Spastrimi i fundit ka nxjerrë në pah përmasat e llogarive false dhe automatike që ndjekin figura të njohura publike, ndërsa rrjetet sociale vijojnë periodikisht të eliminojnë profile të dyshimta për të ruajtur autenticitetin dhe besueshmërinë e platformës.