ChatGPT, platforma shumëfunksionale e zhvilluar nga OpenAI, ka bërë një hap të ri drejt tregtisë elektronike duke prezantuar një funksion të ri që u lejon përdoruesve të kërkojnë, krahasojnë dhe lidhin blerjet drejtpërdrejt me shitësit, përmes bisedës. Ky zhvillim vjen në një kohë kur Google po përballet me presion në rritje nga autoritetet amerikane për çështje antitrust.
Sipas një njoftimi nga OpenAI në platformën X (ish-Twitter), “kërkimi është kthyer në një nga veçoritë tona më të përdorura dhe me rritje më të shpejtë, me mbi një miliard kërkime vetëm javën e fundit.” Në vend që të shfletojnë faqe të tëra me rezultate, përdoruesit mund të fillojnë një bisedë me ChatGPT për të gjetur atë që kërkojnë.
Funksionaliteti i ri do të fokusohet fillimisht në tre kategori kryesore: modë, produkte bukurie dhe elektronikë. ChatGPT do të ofrojë rekomandime të personalizuara që bazohen në kërkime në internet dhe jo në reklama, duke nënvizuar se OpenAI nuk përfiton aktualisht komisione nga blerjet që kryhen përmes platformës.
Rivaliteti me Google është intensifikuar veçanërisht javët e fundit. Një drejtues i OpenAI la të kuptohej se kompania mund të marrë në konsideratë blerjen e shfletuesit Chrome, nëse Google detyrohet ta shesë si pjesë e një vendimi gjyqësor në një proces antitrust në SHBA.
Ky lëvizje e OpenAI e pozicionon ChatGPT si një alternativë të re, inovative dhe potencialisht më të personalizuar ndaj kërkimit tradicional që dominon Google.