Parlamenti gjerman ka miratuar një projektligj të ri që pezullon për dy vjet të drejtën e ribashkimit familjar për refugjatët që nuk gëzojnë statusin e plotë të azilit, por janë përfitues të mbrojtjes plotësuese – kryesisht persona që vijnë nga vende në konflikt si Siria.
Ligji, i propozuar nga CDU/CSU dhe SPD, u justifikua nga Ministri i Brendshëm Alexander Dobrindt si një masë për të frenuar migracionin dhe për të luftuar rrjetet kriminale që shfrytëzojnë skemat e bashkimit familjar. “Po i japim fund modelit të trafikantëve që mjaftohen me një hyrje të vetme në Gjermani për të sjellë më pas të gjithë familjen,” tha Dobrindt në Bundestag.
Sipas ministrit, pezullimi do të ulë me rreth 12 mijë numrin vjetor të hyrjeve në vend dhe synon të lehtësojë sistemin e azilit dhe kapacitetet e integrimit të shoqërisë gjermane.
Projektligji u miratua mes debatesh të forta dhe kundërshtimesh të ashpra nga e majta parlamentare. Deputetët e Partisë së Majtë dhe të Gjelbërve akuzuan qeverinë për shkelje të parimeve humanitare dhe për përçmim të politikave të integrimit. “Kjo është një ditë e errët për humanizmin në Gjermani,” deklaroi deputetja e të Gjelbërve, Schahina Gambir.
Presidentja e Bundestagut, Julia Klöckner, ndërhyri disa herë gjatë seancës për të qetësuar debatet dhe për të rivendosur rendin.
Masa e re vjen në një kohë kur edhe vende të tjera, si Austria, kanë ndjekur një linjë të ngjashme, duke kufizuar të drejtën e ribashkimit familjar për refugjatët pa status të plotë. Kritikët e ligjit paralajmërojnë për pasoja të rënda sociale dhe psikologjike për mijëra familje të ndara që do të mbeten të papërfshira nga mbrojtja ligjore.