Banka e Shqipërisë ka ndërmarrë masa të reja rregullatore për të frenuar rritjen e shpejtë të kredidhënies për banesa, duke vendosur kufizime të qarta mbi raportin e huasë me të ardhurat dhe vlerën e pasurisë së paluajtshme. Vendimi u miratua nga Këshilli Mbikëqyrës, në kuadër të menaxhimit të rreziqeve të ekspozimit të lartë të sistemit bankar ndaj këtij segmenti.
Pas mbledhjes, Guvernatori Gent Sejko sqaroi se për blerjen e banesës së parë, bankat do të mund të financojnë deri në 85% të vlerës së pronës për kreditë në lekë dhe deri në 75% për ato në valutë. Për banesën e dytë, kufijtë janë edhe më të ulët: 80% për kreditë në lekë dhe 70% në valutë.
Një tjetër kufizim i rëndësishëm lidhet me përqindjen që kësti i kredisë zë në të ardhurat mujore të huamarrësit. Për individët me të ardhura në lekë, kësti nuk duhet të kalojë 40% të të ardhurave, ndërsa për ata me të ardhura në valutë, maksimumi i lejuar është 45%. Në rastet kur individi kërkon kredi për një banesë të dytë, këto përqindje bien përkatësisht në 35% dhe 30%.
Gjithashtu, është parashikuar edhe një kufizim kohor për afatin e huasë, i lidhur me moshën e pensionit dhe aftësinë paguese të aplikuesit.
Guvernatori theksoi se këto masa nuk kanë për qëllim të frenojnë aksesin në kredi, por të sigurojnë një sistem më të qëndrueshëm dhe të balancuar financiar, duke sjellë më shumë standardizim në politikat e kredidhënies. Sipas tij, shumë banka aktualisht zbatojnë kritere edhe më të rrepta sesa ato që janë vendosur me vendimin e fundit.