Shitjet fizike të lodrave të njohura Labubu janë pezulluar përkohësisht në të gjithë Mbretërinë e Bashkuar, si pasojë e një valë të papritur interesi që solli kaos në disa dyqane.
Vendimi erdhi pasi një postim viral nga një personazh i njohur publik nxiti një bum kërkesash për lodrat Labubu, duke çuar në turma të mëdha njerëzish, radhë të gjata dhe tensione përpara dyqaneve. Situata e krijuar e bëri të pamundur menaxhimin normal të shitjeve dhe rrezikoi sigurinë e klientëve.
Për të shmangur përshkallëzimin e mëtejshëm të situatës, kompania prodhuese vendosi të pezullojë përkohësisht shitjet fizike, përfshirë edhe ato përmes automatëve të shpërndarjes.
Në njoftimin zyrtar thuhet se: “Shitjet online do të vijojnë normalisht. Jemi duke punuar për të përmirësuar përvojën e blerjes, si në dyqan ashtu edhe në internet.”
Labubu, një lodër koleksionuese me pamje karakteristike, është kthyer në një fenomen të vërtetë për adhuruesit e figurave të rralla, veçanërisht mes të rinjve. Kjo është hera e parë që një ndalim i tillë i shitjeve fizike ndodh në Mbretërinë e Bashkuar për këtë lodër.