Sot, më 26 prill, Vatikani përcjell në banesën e fundit Papa Françeskun, kreun e kishës katolike, i cili ndërroi jetë më 21 prill në moshën 88-vjeçare. I lindur si Jorge Mario Bergoglio në Buenos Aires të Argjentinës, Papa Françesku la një trashëgimi të thellë shpirtërore dhe sociale në historinë moderne të Kishës.
Rreth 250 mijë besimtarë kanë vizituar Bazilikën e Shën Pjetrit gjatë ditëve të fundit për t’i bërë nderimet e fundit Atit të Shenjtë, ndërsa më shumë se 200 mijë të tjerë janë të pranishëm sot në Sheshin e Shën Pjetrit për të marrë pjesë në ceremoninë mortore. Kortezhi funeral do të përshkojë rrugën drejt Bazilikës së Santa Maria Maggiore, ku do të bëhet varrimi.
Riti i mbylljes së arkivolit u zhvillua në orët e mbrëmjes së kaluar në mënyrë private, në prani të Kardinalit Camerlengo dhe zyrtarëve të lartë të Vatikanit. Brenda arkivolit u vendosën monedha të prera gjatë papatit të tij, akti zyrtar i vdekjes, dhe një vello mëndafshi e bardhë mbi fytyrën e tij.
Roma ndodhet sot në një regjim të posaçëm sigurie me rreth 4,000 efektivë policie dhe po aq vullnetarë nga Mbrojtja Civile. Më shumë se 1,500 autobusë kanë mbërritur në qytet për të sjellë pelegrinë nga e gjithë bota.
Në ceremoninë e fundit të Papa Françeskut marrin pjesë 160 delegacione ndërkombëtare, mes tyre 12 monarkë, 52 krerë shtetesh dhe 14 kryeministra, përfshirë personalitete të shquara si Princi William, liderë politikë dhe përfaqësues të organizatave të mëdha botërore.