Tedi Blushi, Sekretari i Përgjithshëm i Partisë së Lirisë, në një intervistë të bërë së fundmi për “Off the Record”, tregoi se si Ilir Meta po ia dilte të drejtonte fushatën e Partisë së Lirisë nga qelia.
“Zoti Ilir Meta ndodhet në kushtet e një izolimi ekstrem, pa prova penale. Zotit Meta po i pamundësohet të komunikojë në mënyrë normale jo vetëm me drejtuesit e PL, por edhe me simpatizantët e tij. Ky izolim ndodhi për shkak se Edi Rama ka frikë nga forca elektorale të zotit Meta dhe të Partisë së Lirisë. Duke përdorur SPAK-un, ai e izoloi edhe PL-në. Por, PL-ja është çdo sekondë në terren, anëtarët e saj në të gjithë Shqipërinë janë në terren, duke bërë detyrën historike për rotacionin”, tha Blushi.
Blushi thekson se roli i zotit Meta vijon të mbetet “lideri i Partisë së Lirisë, ndonëse ndodhet në izolim.
“Zoti Meta është shndërruar sot në simbol frymëzues të lirisë. Ai e ka shndërruar qelinë ku ndodhet në një llogore kundër këtij narkoregjimi. Ai bën çdo përpjekje dhe sakrifica nga më ekstremet për të sjellë rotacionin”, theksoi Blushi.