Kryetari i PL-së, Ilir Meta së fundmi ka dhënë një intervistë nëpërmjet inteligjencës artificiale për “Opinion”.
Gjatë intervistës nga AI, Meta shprehet se rutina e tij ka ndryshuar goxha gjatë ditëve në burg.
Që nga aktiviteti fizik e deri te gatimi, kryetari i PL-së rrëfehet për gjërat të cilat i mësoi brenda katër mureve.
“Dita ime është fantastike. Më duket sikur jam në kavalishencë. Gjithë ditën lexoj dhe shkruaj. Po kështu tri herë në ditë bëj lëvizje dhe stërvitje si kurrë më parë. Për herë të parë në jetën time kam mësuar të gatuaj, se kurrë nuk kam gatuar në konvikt. Kam mësuar gjëra të jashtëzakonshme që do të më ndihmojnë shumë për të ardhmen. Nuk e konsideroj kohë të humbur, por kohë të fituar.
Natyrisht që kam parë se sa njerëz të pafajshëm ndodhen këtu vetëm që dikush të mburret me statistika të cilat vrasin jetë njerëzish dhe familjarësh. Duhet një reformë e vërtetë në sistemin e burgjeve dhe paraburgimit, pasi mbi 60% e njerëzve këtu ose janë të pafajshëm ose mund të hetoheshin në gjendje të lirë, pranë familjarëve të tyre. Duhet rishikuar Kodi Penal dhe gjithë politika penale, e cila lejon shumë abuzime në interpretim dhe shkatërron jetë njerëzish, për të cilat askush nuk mban përgjegjësi. Po kështu duhen dyfishuar pagat e policisë së burgjeve, sepse kanë një punë me shumë tension dhe paga skandaloze. Përveçse edhe vaktin e premtuar prej kohësh nuk e marrin. Harrova të të them se në ping–pong jam më mirë se kurrë në jetën time duke mundur edhe sportistë nga Nigeria”, ka thënë Meta.