Kryetari i Partisë Demokratike Sali Berisha prezantoi sot kandidatët e “PD – Aleanca për Shqipërinë Madhështore” për qarkun e Lezhës. Në fjalën e tij Berisha vuri theksin tek programi i Partisë Demokratike.
Kryedemokrati u shpreh se “ne do të subvencionojmë euron, masën e rënies së saj, sikundër do presim me gërshërë, me forcën e ligjit çdo kanal të parave të zeza që hyjnë në Shqipëri”.
“Ju garantoj ju, ju garantoj këtu se, shteti do të krijojë një bord me të cilin do të kompensojë çdo rënie të euros për eksportuesit. Çdo eksportues humbi me euron 35%, por 35% nuk e kanë fitimin pothuajse asnjëri prej tyre dhe shumica e tyre falimentuan.
Ka 3 vite miqtë e mi që prodhimi industrial bie në pikiatë. Ka 3 vite që eksportet vetëm nga 2023-2024 janë ulur me 32%”, tha Berisha.
Berisha u ndal edhe tek programi për fermerët.
“Ne do të subvencionojmë çdo fidan, çdo kokë bagëti, çdo njësi prodhimi, se ne do të 5-fishojmë subvencionet për fermerët në mënyrë që ata të marrin ato subvencione që merr fermeri në Maqedoni, Kosovë, Serbi e Mal të Zi.
“I garantoj fermerët se linja e kreditit të butë, në të cilën qeveria do të paguajë 80% të interesave do të instalohet menjëherë me bankën e re të zhvillimit që do të krijojmë”, tha Berisha.
Berisha tha se Ballkani i Hapur do të përfundojë në kosh dhe se nuk do të zbatohet pas ardhjes në pushtet të PD-së.
“I garantoj fermerët e Lezhës dhe gjithë Shqipërisë se do të mbrohet, do të ketë mbrojtje sezonale për prodhimet e tyre, se çdo vend në botë i mbron në sezon, prodhimet e fermerëve të vet, përveç këtyre që hapën kufijtë për Ballkanin e Hapur dhe falimentuan me qindra e mijëra ferma, përgjysmuan bagëtitë dhe prodhimin”, tha Berisha.
“Ju garantoj se ulliri do të jetë një projekt kryesor, gjersa të arrijmë në 20 milionë rrënjë”, shtoi Berisha.
Berisha tha po ashtu se “do të subvencionojmë bimët aromatike”.