Modelja e njohur Bella Hadid ka shqetësuar sërish fansat, pasi ka treguar se gjendja e saj shëndetësore është përkeqësuar për shkak të sëmundjes Lyme, me të cilën po përballet prej më shumë se një dekade.
29-vjeçarja, e diagnostikuar me këtë sëmundje në vitin 2013, ndau një përditësim emocional me ndjekësit e saj në Instagram Stories, ku publikoi një selfie me lot në sy dhe foli hapur për vështirësitë që po kalon.
Sipas Hadid, simptomat vazhdojnë të jenë të forta, pavarësisht trajtimeve të shumta dhe konsultave me mjekë të ndryshëm.
“Aktivizimi i sëmundjes nuk po më kalon… kam fjetur 11 orë, përsëri… bëj gjumë çdo ditë. Kam ndjekur çdo trajtim nga çdo mjek që kam vizituar. Ende asgjë nuk po më ndihmon,” shkroi modelja.
Me humor të hidhur, ajo shtoi se ka “vetë-diagnostikuar edhe 12 gjendje të tjera”, ndërsa u përpoq të përshkruante gjendjen e saj fizike dhe mendore.
Bella siguroi ndjekësit se po kujdeset për veten dhe po qëndron e hidratuar, por pranoi se lodhja është aq e madhe sa nuk arriti të dilte as për një shëtitje.
“Dhe jo, nuk dola për shëtitje sepse u lodha duke ecur deri në kuzhinë”, shkroi ajo.
Modelja tregoi gjithashtu se ndjen një mjegullim të vazhdueshëm mendor.
“Nuk mendoj se po funksionon asnjë qelizë në trurin tim dhe dy të fundit po zihen me njëra-tjetrën, kështu që më vjen keq nëse ndonjëherë ju kam thënë në një ditë të keqe të mbani ditar — e tërheq mbrapsht dhe kërkoj falje”, u shpreh Hadid.
Në fund të postimit, ajo ndau edhe një moment të vogël pozitiv, duke thënë se kishte arritur të bënte një dush “pa u fikur”, një detaj që pasqyron vështirësitë me të cilat po përballet në përditshmëri.