Kreu i Partisë Demokratike- Demokratët Euroatlantikë, Lulzim Basha i ftuar në emisionin “Ekspres” të gazetarit Nolian Lole në RTSH1, na zbuloi më shumë për pazaret e politikës siç i ka cilësuar ai, midis kryeministrit Edi Rama dhe kreut të PD-së, Sali Berisha.
Teksa u pyet nëse po bën opozitë ndaj opozitës, Basha u shpreh se është ish-kryeministri Berisha ai që po e realizon një gjë të tillë, duke bashkëpunuar me kreun e qeverisë.
“Opozita e opozitës është ajo që edhe BE e tregoi qartë që Edi Rama dhe Sali Berisha bashkuan votat për të nxjerrë 105 individë të korruptuar të qeverisë së Edi Ramës të dënuar nga GJKKO, për t’u dhënë lirinë. Bashkëpunimi tjetër është mbyllja e listave që shkon kundër aspiratave të qytetarëve që ta zgjedhin ata deputetin”, u shpreh Basha.
A do arrihet krijmi i një qeverie teknike?
Ndërkohë që ceku pak dhe protestat e Partisë Demokratike të drejtuar nga ish-kryeministri Berisha, ndonëse ndodhet në arrest shtëpie, Basha theksoi se këto protesta nuk janë për të arritur në formimin e një qeverie teknike.
Sipas demokratit, të gjitha këto bëhen për të “mbuluar pazaret e njëpasnjëshme me Edi Ramën”.
“Protestat e sotme nuk janë për qeveri teknike. Ato janë për të mbuluar pazaret e njëpasnjëshme me Edi Ramën. E kanë të kotë. Jo se kështu them unë, po kështu thonë demokratët. Kështu thonë edhe ata që kanë qëndruar pas z. Berisha me shpresën se ky me të vërtetë për 6 muaj do ta rrëzonte Edi Ramën. E kanë kuptuar që as për 1 vit, as për 2 vjet nuk është hedhur asnjë hap serioz në këtë drejtim. Por përkundrazi janë rakorduar edhe një herë interesat e Sali Berishës dhe Edi Ramës me pazare si ato që tregova”, tha Basha.
Përgjatë intervistës, u fol pak edhe arrestimin e Ilir Metës. Sipas tij, mënyra e arrestimit të ish-presidentit të vendit ishte për të bërë pis Strukturën e Posaçme Antikorrupsion.
“Mënyra se si është vepruar është një përpjekje për të bërë pis SPAK-un. Qytetarët duhet ta dinë se nuk është SPAK-u që arreston dhe as BKH. Këto kryhen nga struktura e Policisë së Shtetit siç kanë qenë gjithmonë nën drejtimin e kryeministrit dhe ministrit të Brendshëm. Një shfaqje e tillë e shëmtuar ia doli për fat të keq ia doli të zhvendosë vëmendjen e opinionit publik nga fakti i arrestimit të një prej figurave protagoniste prej 34 vitesh në politikë për akuza korrupsioni te mënyra e arrestimit”, theksoi Basha.
A keni frikë nga hetimet për 21 Janarin?
Më tej teksa u pyet për dosjen e 21 Janarit ai tha se nuk ka asnjë frikë nga hetimet që po zhvillohen nga SPAK për këtë çështje.
“Nuk kam frikë nga asnjë dosje hetimore, dhe mbështes me gjithë forcë hetimin e pavarur dhe profesional të çdo dosjeje hetimore nga struktura e Posaçme Antikorrupsion. Këtë qëndrim që kam unë, e kanë të gjithë demokratët euroatlantikë sepse besojmë që ka ardhur koha që nga njëra anë pandëshkueshmëria të marrë fund dhe nga tjetër të marrë fund edhe loja e shpifur hipokrite e akuzave të ndërsjella politike por që nuk përfundojnë kurrë në një hetim, në një çështje para drejtësisë dhe në një vendim të drejtësisë”, nënvizoi Basha.
LEXO EDHE: