Njësitet e Policisë së Kosovës, në bashkëpunim me Agjencinë e Inteligjencës (AKI), Prokurorinë dhe nën mbikëqyrjen e KFOR-it dhe EULEX-it, kanë kryer një operacion të madh sot në fshatin Vallaq të komunës së Zveçanit.
Gjatë bastisjes është gjetur një arsenal i konsiderueshëm armësh, përfshirë raketahedhës dore (zolla), granata dore, tronditëse, si dhe armë dhe municion të ndryshëm, që sipas autoriteteve, mund të shërbenin për aktivitet terrorist.
Ministri në detyrë i Punëve të Brendshme, Xhelal Sveçla, përmes një postimi në Facebook, bëri me dije se objekti ku u gjetën armët i përket politikanit serb Aleksandar Arsenijeviq, një figurë e njohur në skenën politike të veriut të Kosovës.
“Sot kemi goditur një strukturë që përbën kërcënim të drejtpërdrejtë për sigurinë dhe stabilitetin e vendit. Krimi nuk mund të fshihet kurrë përpara institucioneve vigjilente dhe profesionale që punojnë pa ndërprerje për rendin dhe ligjin,” shkroi Sveçla.
Ai gjithashtu deklaroi se institucionet e sigurisë do të vazhdojnë operacionet pa kompromis për të çrrënjosur të gjitha rrjetet kriminale dhe terroriste që, sipas tij, janë të lidhura me strukturat serbe.