HAGË– Mark Rutte, Sekretari i Përgjithshëm i NATO-s deklaroi se nuk ka asnjë shqetësim që presidenti i Shteteve të Bashkuara të Amerikës, Donald Trump publikoi një mesazh privat që i kishte dërguar atij, ndërsa udhëtonte drejt Holandës për samitin e liderëve të NATO-s.
“Çfarë i thashë në atë mesazh është plotësisht e saktë dhe nuk kam asnjë problem që ai e ndau publikisht.”- tha Rutte gjatë fillimit të samitit në Hagë.
“Mendoj se është thjesht një deklaratë faktike.”- shtoi ai. Mesazhi, i publikuar nga Trump në platformën e tij Truth Social të hënën, lavdëronte përpjekjet e tij për të nxitur vendet anëtare të NATO-s të rrisin shpenzimet për mbrojtjen.
“Do të arrini diçka që asnjë president amerikan për dekada nuk e ka arritur. Europa do të paguajë më shumë, ashtu siç duhet, dhe kjo do të jetë fitorja juaj.”- shkroi Rutte në mesazh.
Një gazetar e pyeti nëse publikimi i këtij mesazhi e kishte shqetësuar.
“Absolutisht jo.”-u përgjigj shkurt Rutte.
Gjatë të njëjtës udhëtim drejt Europës, Trump nuk shprehu mbështetje të plotë për nenin 5 të traktatit të NATO-s, që garanton mbrojtje të përbashkët në rast sulmi ndaj një anëtari. Megjithatë, Rutte theksoi se është i bindur për angazhimin e SHBA-së ndaj aleancës.
“Sipas meje, është e qartë se Shtetet e Bashkuara mbeten të përkushtuara plotësisht ndaj NATO-s dhe ndaj nenit 5. Po ashtu, ekziston edhe pritshmëria – që do të përmbushet sot – që Kanadaja dhe vendet europiane do të rrisin ndjeshëm shpenzimet e tyre për mbrojtjen.”-shtoi ai./Radar.al
Taksia përplasi 3 fëmijët që lëviznin me monopatinë, shoqërohet drejtuesi i mjetit