Policia ka arrestuar Erisjaldo Gjuta, 22 vjeç, i shpallur në kërkim një ditë më parë pas plagosjes me armë zjarri të një 18-vjeçareje në hotelin e tij në Tiranë. Ai akuzohet për veprat penale “Moskallëzim i krimit”, “Veprime që pengojnë zbulimin e të vërtetës”, kryer në bashkëpunim, si dhe “Mbajtja pa leje e armëve shpërthyese dhe municionit”.
Sipas njoftimit zyrtar, specialistët për Hetimin e Krimeve kundër Jetës dhe Pronës, në bashkëpunim me Komisariatin e Policisë Nr. 1, bënë të mundur kapjen dhe ndalimin e tij.
Ngjarja ndodhi në dhomën e hotelit në pronësi të 22-vjeçarit, ku 18-vjeçarja me iniciale N.M. dyshohet se është vetëplagosur me armë zjarri. Në momentin e të shtënave, Gjuta dhe familjarët e tij ndodheshin në katin e parë të biznesit. Pasi dëgjuan krismën, ata janë ngjitur në dhomë dhe e kanë gjetur të renë të plagosur.
Sipas hetimeve paraprake, nëna e 22-vjeçarit dhe një i afërm e kanë transportuar vajzën në spital, duke deklaruar fillimisht se e kishin gjetur të plagosur në rrugë. Më pas, e reja ka dëshmuar se është vetëplagosur me armën që ndodhej në dhomën e hotelit dhe se aktin e kishte kryer për arsye personale.
Në lidhje me ngjarjen janë arrestuar edhe Mirvetja Gjuta, nëna e 22-vjeçarit, si dhe Vladimir Gjuta, xhaxhai i tij. Ndërkohë, janë shpallur në kërkim babai i tij, Sajmir Gjuta, dhe kushëriri Elvir Gjuta, të dyshuar për fshehje krimi dhe pastrim të gjurmëve. Hetimet vijojnë për zbardhjen e plotë të rrethanave të ngjarjes.