Kreu i Partisë Demokratike, Sali Berisha, nuk i kurseu akuzat në drejtim të kryeministrit Edi Rama gjatë një takimi me mbështetësit në njësinë nr. 5 të Tiranës, ku prezantoi kandidatët për zgjedhjet e 11 majit. Me tone të ashpra dhe krahasime provokuese, Berisha theksoi se edhe diktatori Enver Hoxha, ndonëse i ashpër, nuk kishte abuzuar me pronën publike në mënyrën që, sipas tij, po vepron pasardhësi i tij politik.
“Enver Hoxha ishte diktatori më i egër në Europën e pas Luftës së Dytë Botërore. Por, për të qenë të drejtë, ai nuk ia vuri shtëpinë në emër vetes. Kishte një shtëpi 3-4 katëshe, me një oborr prej 2 mijë metrash. Po Edi Rama? Ndërton saraje me themele 57 metra dhe park 5800 metra katror, ndërkohë që në deklaratën e pasurisë ka vetëm 3800 euro dhe 400 mijë lekë,” tha Berisha.
Ai vijoi me kritika të forta, duke akuzuar Ramën për pasurim të paligjshëm dhe për keqqeverisje të pashembullt: “Njëherë thonë se vila u ndërtua me ‘Kurbanin’, njëherë se i solli e shoqja nga emigracioni. Ua vodhën shqiptarëve.”
Në një krahasim të befasishëm, Berisha risolli një deklaratë të Donald Trump, duke e lidhur me situatën në Shqipëri: “Trump u tha amerikanëve se më i rrezikshëm se Rusia dhe Kina është armiku i brendshëm. Edhe ne kemi një armik të brendshëm që ka bërë më shumë dëme se çdo pushtim në histori.”
Ai e përmbylli fjalën me një thirrje për reflektim: “As pushtimi osman nuk e zbrazte Shqipërinë si ky pushtet. Ky është armiku më i madh që kemi pasur ndonjëherë.”