Ambasadori i Afrikës së Jugut në Francë, Nkosinathi Emmanuel Nathi Mthethwa, 58 vjeç, u gjet i vdekur të martën jashtë një hoteli në Paris. Ai kishte rezervuar një dhomë në katin e 22-të, por sipas raporteve, dritarja ishte hapur me forcë.
Trupi i Mthethwa, një bashkëpunëtor i ngushtë i ish-presidentit Jacob Zuma, u gjet pranë hotelit. Një burim pranë hetimeve, i cili kërkoi anonimitet, tha se ambasadori vuante nga depresioni dhe vdekja e tij mund të ketë qenë vetëvrasje.
Ministri i Jashtëm i Afrikës së Jugut, Ronald Lamola, në një deklaratë nga Pretoria, konfirmoi vdekjen dhe njoftoi se autoritetet franceze kanë nisur një hetim të plotë. Zhdukja e Mthethwa-s ishte raportuar të hënën nga gruaja e tij, pas një mesazhi shqetësues që ai i kishte dërguar.
Mthethwa kishte marrë detyrën si ambasador në dhjetor 2023. Ai ka shërbyer në poste të larta qeveritare, përfshirë:nMinistër i Policisë (2009–2014); Ministër i Sigurisë (2008–2009); Ministër i Arteve dhe Kulturës (2014–2019), dhe më pas i Sportit, Arteve dhe Kulturës (2019–2023).
Gjithashtu, ai ishte pjesë e bordit organizativ të Kupës së Botës në Futboll 2010 dhe një zyrtar i lartë i Kongresit Kombëtar Afrikan (ANC) midis 2007–2022. Gjatë periudhës së aparteidit, Mthethwa punoi në fshehtësi brenda krahut ushtarak të ANC-së dhe u arrestua gjatë gjendjes së jashtëzakonshme në vitin 1989.
Ngjarja ka tronditur komunitetin diplomatik dhe politik të Afrikës së Jugut, duke nxitur reagime nga autoritetet dhe kolegët e tij.