Administrata Trump po e çon më tej politikën e saj kundër emigracionit, ndërsa Departamenti i Sigurisë Kombëtare i SHBA (DHS) njoftoi ndërtimin e një qendre të re ndalimi për emigrantët në Florida. Prokurori i Përgjithshëm i Floridës, James Uthmeyer, e ka quajtur këtë objekt “Alkatrazi i Krokodilëve”.
Kjo qendër po ndërtohet në një aeroport të braktisur në mes të moçaleve të Everglades, një zonë e mbushur me kafshë të egra si aligatorë, pitonë, pantera dhe mace të egra. Uthmeyer ka theksuar se nuk është e nevojshme të investohen shuma të mëdha për sigurinë e perimetrit, pasi kushdo që do të tentojë të arratiset, do të përballet me rreziqet natyrore të zonës.
Qendra, e cila shtrihet në një sipërfaqe prej rreth 101 kilometra katrorë, pritet të jetë funksionale që në fillim të korrikut. Garda Kombëtare do të jetë e pranishme për të ndihmuar në administrimin e saj. Sipas planit të aprovuar nga qeveria federale, kapaciteti i qendrës do të zgjerohet me 5,000 shtretër të rinj, ndërsa në të ardhmen planifikohet ndërtimi i objekteve shtesë.
Procedurat e ndalimit të emigrantëve do të zhvillohen sipas vendimeve të gjykatave. Ndërtimi i kësaj qendre vjen në një kohë kur administrata Trump po ushtron presion që autoritetet të realizojnë të paktën 3,000 arrestime emigrantësh në ditë.
Paralelisht, shumë emigrantë janë dërguar më parë në Guantanamo ose deportuar në burgun e diskutueshëm CECOT në El Salvador, i njohur për mbipopullim dhe shkelje të rënda të të drejtave të njeriut.
Objekti i ri në Everglades shihet si zgjidhje për tejmbushjen e qendrave ekzistuese të ndalimit në SHBA. Ndërkohë, disa javë më parë, Donald Trump urdhëroi edhe rihapjen e famëkeqit burg të Alcatrazit, i njohur historikisht për pamundësinë e arratisjes për shkak të vendndodhjes së tij në një ishull të izoluar pranë San Franciskos.