NATO shpreh shqetësimin për mundësinë e vendosjes së armëve bërthamore nga Rusia në hapësirë, sipas një raporti të publikuar sot nga e përditshmja gjermane Welt am Sonntag.
Sekretari i Përgjithshëm i NATO-s, Mark Rutte, deklaroi se Aleanca është në dijeni të planeve të mundshme të Rusisë për të vendosur armë bërthamore në hapësirë. Ai theksoi se kapacitetet aktuale hapësinore të Moskës janë të vjetruara dhe nuk mund të krahasohen me ato të vendeve perëndimore, sipas burimeve ndërkombëtare të lajmeve.
“Pikërisht për këtë arsye,” u shpreh Rutte, “zhvillimi i armëve bërthamore në hapësirë mund t’i japë Rusisë një përparësi të re, çka përbën një shqetësim serioz për sigurinë globale.”
Raporti thekson gjithashtu se të ashtuquajturat armë anti-satelitore nuk synojnë Tokën drejtpërdrejt, por objektivat e tyre janë satelitët. Megjithatë, shkatërrimi i tyre mund të shkaktojë pasoja të rënda për jetën në Tokë, pasi shumë sisteme jetike varen nga funksionimi i këtyre pajisjeve.
Rutte paralajmëroi gjithashtu për një shkelje të mundshme të Traktatit të Hapësirës së Jashtme të vitit 1967, i cili parashikon përdorimin paqësor të hapësirës nga vendet nënshkruese. Ky traktat është ratifikuar nga shumica e vendeve të botës, përfshirë Shtetet e Bashkuara dhe Rusinë.
Sekretari i Përgjithshëm vuri në dukje se vitet e fundit konkurrenca në hapësirë është intensifikuar ndjeshëm, duke e bërë atë një mjedis më të mbipopulluar, më të rrezikshëm dhe më të paparashikueshëm se kurrë më parë.
“Kjo situatë nuk ndikon vetëm në aktivitetet komerciale, por ka pasoja të drejtpërdrejta edhe për mbrojtjen dhe sigurinë në përgjithësi,” shtoi ai.
Ndërkohë, sipas një raporti tjetër, NATO vendosi në vitin 2021 që klauzola për mbrojtjen kolektive, e përcaktuar në nenin 5 të traktatit të saj themelues, të aplikohet edhe për sulmet që vijnë nga ose ndodhin në hapësirë. Ky nen përcakton se një sulm i armatosur kundër një ose më shumë vendeve anëtare konsiderohet si sulm ndaj të gjithë Aleancës.