Një situatë e rrezikshme është shënuar këtë të diel në fshatin Algjinaj, Njësi Administrative Shezë, në Bashkinë e Peqin, ku një rrëshqitje e madhe dhe fundosje e tokës ka shkaktuar çarje të thella në tokë dhe ka bllokuar rrugën e fshatit.
Banorët raportojnë se fenomeni ka deformuar sipërfaqen e tokës dhe ka rrezikuar shembjen e tre banesave përreth. Rruga rurale që lidhet me zonat përreth është bërë e pakalueshme për automjetet, duke krijuar vështirësi të menjëhershme në qarkullim.
Çarjet dhe zhvendosjet e dheut janë evidentuar edhe pranë disa shtëpive, duke shkaktuar shqetësim për sigurinë e familjeve. Banorët kërkojnë ndërhyrje urgjente nga institucionet përkatëse për të vlerësuar rrezikun dhe për të marrë masa stabilizuese, në mënyrë që të parandalohet përkeqësimi i situatës dhe izolimi i zonës.
