Së fundmi është mësuar se Autoriteti Kombëtar i Ushqimit ka bllokuar mishin, produkt pule (fileto e ngrirë).
Ky vendim u mor pasi nga kontrollet e bëra mishi rezulton të ketë patur në përbërje të tij salmonelë.
Më tej AKU njofton se produkti në fjalë është importuar nga Brazili, ndërsa pas verifikimit, ka marrë masat administrative dhe ligjore ndaj subjektit përgjegjës.
Ndërsa thuhet se situata është në ndjekje të vazhdueshme.
AKU: Referuar analizimit në ISUV në datën 21.03.2025, për prani të Salmonella Typhimurium në një mostër produkt pule (fileto e ngrirë), e importuar nga Brazili, AKU ka ndërhyrë në mënyrë të koordinuar me strukturat përgjegjëse për gjurmimin, verifikimin dhe bllokimin e produktit në fjalë, si dhe për marrjen e masave administrative dhe ligjore ndaj subjektit përgjegjës.
Është inspektuar subjekti importues për ndjekjen e gjurmueshmërisë, i cili është referuar në organet e Prokurorisë së Rrethit Gjyqësor Tiranë, për veprime të mëtejshme proceduriale, për sa i takon elementëve të veprës penale për mosrespektim të kritereve të gjurmueshmërisë dhe dhënie të informacionit të pasaktë.
Autoriteti Kombëtar i Ushqimit siguron publikun se situata është në ndjekje të vazhdueshme dhe se çdo veprim është ndërmarrë në funksion të transparencës, sigurisë dhe mbrojtjes së shëndetit të qytetarëve.