Pas vendimit të dhënë nga Gjykata e posaçme, e cila la pas hekurave “trurin financiar” të bandës së Suel Çelës, Bujar Shega është lënë në “qiell të hapur”.
Referuar disa dokumenteve të siguruara nga Newsbomb mësohet se Marsel alias Bujar Shega nuk do të jetë më administrator i kompanisë së pastrimit dhe grumbullimit të mbetjeve “Viola Green”.
Siç mund të shikohet dhe në dokumentet e siguruara, ortakët pas një mbledhje urgjente kanë vendosur të zgjedhin një administrator të ri.
Kujtojmë se SPAK e akuzon zyrtarisht Bujar Shegën për veprat penale “Trafikimi i lëndëve narkotike” dhe “Pastrimi i produkteve të veprës penale ose veprimtarisë kriminale” kryer në kuadër të organizatës.
Viola Green ka marrë dhjetra milionë euro tendera publikë, në 5 bashki të vendit, Elbasan, Prrenjas, Kuçovë, Cërrik dhe Peqin.
Sipas të dhënave nga Open Corporates rezulton se kompania e drejtuar nga Bujar Shega ka fituar 10 tendera në 5 bashkitë e mësipërme, nga 2 për secilën bashki, me vlerë mbi 7.5 miliardë lekë të vjetra.
Megjithatë, dy ortakët e “Viola Green”, Fatos Jaupi dhe Sherif Kapllani nuk janë mjaftuar vetëm me caktimin e administratorit të ri. Në ditët e fundit të Janarit 2025, ata vendosën të ndryshonin dhe zyrat e kompanisë, duke u transferuar nga ETC-ja në rrugën “Gjikë Kuqali” te Njësia 5.
Nuk është e qartë nëse këto lëvizje bëhen për të humbur gjurmët për shkak të hetimeve të Prokurorisë së Posaçme ndaj ish-administratorit dhe aksionerit kryesor Bujar Shega, apo thjesht dy ortakët kanë vendosur “ti bëjnë dalje” Shegës.
Kjo e fundit mbetet pista më pak e besueshme, ndaj mbetet të shihet nëse nga ana e organit të akuzës do të ketë vendim dhe për kompaninë të cilën Bujar Shega e përdorte për të pastruar paratë e krimit, siç citohet në dosje.
