Një aksident tragjik ndodhi mëngjesin e së dielës në Berat, ku humbi jetën 29-vjeçari Orneli Caushaj. I riu udhëtonte së bashku me bashkëshorten e tij, gazetaren Sindi Salaj, e cila fatmirësisht arriti të shpëtojë. Çifti është prindër i një vajze dyvjeçare.
Ngjarja ka tronditur komunitetin vendas dhe miqtë e çiftit, të cilët rrëfejnë se Orneli dhe Sindi njiheshin që nga gjimnazi dhe dashuria e tyre kishte kaluar sfidat e jetës. Sara Gjordeni, shoqe e tyre e ngushtë, rrëfeu:
“Këto janë lajmet me të cilat nuk doja të zgjohem. Orneli dhe Sindi janë njohur që në gjimnaz dhe kanë qëndruar bashkë përjetësisht. Ishin shumë të lumtur dhe vetëm pak ditë më parë flisja për ta me dikë. Sindi ka shpëtuar, Orneli jo… Nuk dua të jem në vendin e saj sot, asnjëherë.”
Sara thekson se aksidenti nuk lidhej me pakujdesinë e çiftit:
“As Orneli as Sindi nuk ishin të papërgjegjshëm ose të dehur. Kjo ngjarje tregon qartë se sa e shkurtër është jeta dhe sa shumë duhet të vlerësojmë çdo moment me të dashurit tanë.”
Policia dhe autoritetet e rrugës po hetojnë shkaqet e aksidentit, ndërsa komuniteti i Beratit është në zi për humbjen e këtij të riu, që la pas një familje të tronditur dhe një vajzë të vogël.
POSTIMI I PLOTË
“Këto janë lajmet me të cilat NUK dua të zgjohem. Quhej Ornel Caushaj dhe nusja e tij Sindi Salaj. Me Ornelin kam qene ne klase ne fillore dhe gjimnaz ne Kuçove, Sindi ka qenë në klase paralele me ne. Te dy janë dashuruar qe shume te vegjël, nuk ja kane lëshuar kurrë dorën njeri tjetrit. I shihja me admirim sesi sfidat e jetës nuk i ndanë kurrë. Jeta se fundmi u dha dhe një vajze qe s’besoj se është me shume se dy vjeç. Ishin shume te lumtur dhe vetëm pardje me ra te flisja për ta me dikë. Sindi ka shpëtuar, Orneli jo! S’do doja sot te kisha qene ne vendin e saj, asnjëherë!!! Për ju qe komentonit mallkime sesi shoferet ecin shpejt, ju siguroj qe as Orneli as Sindi nuk kane qene njerëz te papërgjegjshëm, as te dehur qe ne shtëpi i prisnin te vogël te tyret! Duhet te vini te shihni infrastrukturën e rrugëve, fshatrave të Beratit e më pas të gjykoni. Kjo ngjarje më ka bërë edhe një herë tjetër të kuptoj sesa e shkurtër është jeta dhe sa shumë duhet vlerësuar çdo moment me të dashurit tuaj të zemrës. Jam ende në mosbesim kur mendoj sa mirë i njoh të dy… Ngushëllimet me të mëdha e me zemër për prindërit e Ornelit, Sindit dhe çdokujt tjetër të prekur nga kjo fatkeqësi. “