Deputetja e zgjedhur e Partisë Socialiste në Fier, Zegjine Çaushi, ka reaguar me një videomesazh ironik dhe thumbues, pas përmendjes së saj nga Sali Berisha në seancën e fundit parlamentare, përmes deklaratave të Gazment Bardhit.
Në prag të një leksioni në akademinë politike të PS, Çaushi përdori një ton satirik për të komentuar përplasjet e fundit brenda Partisë Demokratike, duke i quajtur “aktorët e serialit ‘Agonia e PD-së’”. Ajo u shpreh se do të ishte e nevojshme një analizë psikologjike për Berishën dhe Bardhin, duke sugjeruar me ironi që këtë punë ta marrë përsipër “psikologia Kujtuina”.
“Del Gazi, i bukri i dheut… dhe thotë: ‘Nuk mendoj të bëhem kryetar, të shohim pas 10 vitesh’ – por ti, Gazo, i ke djegur të gjitha jetët si në një videolojë. Kjo ishte mundësia jote e fundit”, tha Çaushi, duke e cilësuar deklaratën e Bardhit si të pashpresë dhe vetë atë si figurë që “vetëm dëm i ka bërë partisë”.
Ajo ironizoi edhe me faktin që Berisha në Kuvend kishte përmendur emrin e saj: “Më kërkon mua, ku është Zegjineja thotë, që ta hekurosë njëherë Gazin. Kjo është thirrje për ndihmë!”.
Çaushi e mbylli videon me një paralajmërim ironik për Bardhin:
“Kujdes Gazo, se ujk i vjetër bababufi, mund të ketë ndonjë ‘as nën mëngë’ për ty… Kujdes vapën, se je delikat ti.”
Mesazhi i saj është komentuar gjerësisht në rrjet si një sulm i drejtpërdrejtë i mbështjellë me humor politik, në vijën e tensioneve mes maxhorancës dhe një opozite që vazhdon të përballet me kriza të brendshme të thella.