Reperi i njohur Rigels Rajku (Noizy) ka folur për herë të parë hapur mbi një mundësi të tij në politikë. I ftuar në emisionin Inside Albania me gazetaren Alice Taylor, në Euronews Albania, Noizy u pyet nëse do pranonte një ftesë nga kryeministri Edi Rama për të drejtuar Ministrinë e Kulturës apo një tjetër post politik.
“Unë 100% do ta pranoja. Jam njeri fjale. Nuk flas si politikan, por do të mbaja çdo premtim. Nuk më duhen para, nuk i kam fituar me të paligjshme. Politika për mua nuk do të ishte interes personal, por shërbim”, – u shpreh ai.
Reperi theksoi se për të, lumturia nuk lidhet me luksin apo pasurinë, por me paqen e brendshme dhe aftësinë për të treguar se në Shqipëri mund të arrihet suksesi pa rrugë të paligjshme.
“Kam mjaftueshëm për të jetuar. E kuptova se sa më shumë para të bësh, aq më të mëdha i bën kështjellat, por në fund ajo që të bën të lumtur është diçka e thjeshtë – të flesh nën qiell të hapur, në natyrë. Nuk ka të bëjë me luksin, por me paqen”, – shtoi Noizy.
Ky deklarim ka ndezur menjëherë diskutime mbi mundësinë e reperit për të pasur një rol publik jashtë muzikës, duke e parë veten si një njeri që do të mbante fjalën edhe në politikë.