Ish kandidati i pavarur për Bashkinë Tiranë Arben Tafaj, është ndarë nga jeta ditën e sotme (2 dhjetor). Ishte policia ajo që njoftonte se një person ishte rrëzuar nga një lartësi 10 metra e për pasojë kishte ndërruar jetë.
Radar.al konfirmoi se ngjarja tragjike ka lidhje me drejtuesin e shoqatës ‘Tirana’, Arben Tafaj.
Lajmin për humbjen e tij e njoftoi edhe mjeku Ilir Alimehmeti, i cili me anë të një postimi në rrjete sociale shpreh ngushëllime për familjen Tafaj.
“Me hidhërim të thellë u njoftova për ndarjen e papritur nga jeta të z. Arben Tafaj, i cili nuk ishte vetëm një mik, por edhe një qytetar elitar, një aktivist i vazhdueshëm dhe një politikan i spikatur me tone gjithnjë të moderuara qytetare.
Humbja e Benit është patjetër humbje e hidhur për familjarët dhe miqtë e tij, por është humbje e madhe edhe për qytetarët dhe qytetin e Tiranës! Ngushëllime të ndjera familjes Tafaj për humbjen e një njeriu të dashur, të urtë e të matur. Do të na mungosh Beni”, shkruan Alimehmeti.
Radar.al