Atletja e shumënjohur shqiptare, Luiza Gega, e ftuar në studion e “Rudina”, rrëfeu emocionet që përjetoi përgjatë Lojërave Olimpike “Paris 2024”.
Atletja shqiptare, na zbuloi se përjetoi goxha presion, për shkak të sukseseve të mëparshme dhe pritshmërive për të.
Më tej Gega foli dhe për postimin nëpërmjet të cilit kërkoi falje për mosarritjen e objektivit, duke theksuar se aty kuptoi sesa shumë njerëz e donin.
Sportistja kuqezi, deklaroi se nuk kishte marrë aq shumë komente, as kur u shpall kampione Evrope në vitin 2022.
“Tifozët ta japin frymën e vërtetë olimpike. Rrugëtimi për të qenë në Olimpiadë është shumë i gjatë, që të jesh pjesë dhe për të pretenduar. Për të marrë pjesë aty, duhet të kesh rezultate të caktuara. Objektivi im ishte diçka tjetër. Në Lojërat Olimpike të Tokios arrita të futesha në finale dhe ke një ambicie sportive që të kërkosh më shumë. Vija nga dy vite shumë të suksesshme, siç ishte viti 2022, ku u shpalla kampione Evrope. Pa dashje, fillova të kem shumë presion, sepse njerëzit gjithmonë presion më shumë. Duke qenë e vetmja shqiptare në këto nivele, ndjen shumë përgjegjësi. Presioni ishte shumë i madh. Sportet individuale e kanë këtë. Kjo ishte arsyeja, përse Lojërat Olimpike kishin shumë presion.
Ndoshta nuk duhet të kërkoja falje, por njerëzit që prisnin më shumë dhe unë u ndjeva në faj. Më pëlqen që t’i kem këto përjetime dhe t’i ndaj. Kam pasur edhe sfida të mëdha, sepse këto e bëjnë të bukur sportin. Kur ndjehesh e paarritur në atë që je lodhur, nuk ia ke dalë. Nuk duhet të dorëzohesh, por duhet të gjesh forcën për të vazhduar. Nga postimi kuptova sesa shumë njerëz ka që më duan. Nuk kisha marrë kurrë aq komente, as kur isha kampione Evrope.”, u shpreh Luiza Gega.
LEXO EDHE:
“Janë gjithmonë ka**t dhe injorantët”- Albano Bogdo: Samir Mane dhe Luiza Gega …