Gjykata e Apelit pasi e shqyrtoi ankimimin, vendosi lënien në fuqi të dënimit për ish-zyrtaren e shtetit Alda Klosin dhe Rozeta Dobin e djalin e saj. Dobi punonte si pastruese në shtëpinë e ish zyrtares dhe bashkëpunoi me të birin në fshehjen e parave të vjedhura.
Më 19 mars 2024 Gjykata e Shkallës së Parë dha vendimin:
Gjykata e Tiranës deklaroi fajtore për fshehje dhe mosdeklarim të pasurisë Alda Klosin ish-shefen e kabinetit të ish-ministrit të Shtetit për Rindërtimin dhe Programin e Reformave, Arben Ametaj, duke e dënuar atë me 2 vite e 6 muaj burg.
Ndërkohë pastruesje Rozeta Dobi dhe djali i saj Havier Dobi u shpallën fajtor për ‘vjedhje me pasoja të rënda” në bashkëpunim dhe u dënuan konkretisht me 7 dhe 5 vite burg.
Për të tre të akuzuarit aplikohet gjykimi i shkurtuar duke përfituar uljen e 1/3-ës së dënimit dhe përfundimisht Alda Klosi do të vuajë 20 muaj burg, Rozeta Dobi 4 vite e 8 muaj, e Havier Dobi mbetën 3 vite e 4 muaj burg.
Prokuroria nga hetimet deklaroi se shuma që u grabit në banesën e Alda Klosit nga pastruesja, nuk rezulton të provohet me burime të ligjshme.