Me finalizimin e operacionit të koduar “Four”, Policia e Elbasanit ka vënë në pranga një 56-vjeçar i cili mësohet se trafikonte në mënyrë të paligjshme shtetas pakistanezë.
Sipas burimeve mësohet se Ferenc Kovaç u dakordësua për t’i transportuar 4 pakistanezët me furgonin e tij kundrejt një fitimi.
Policia ka vënë në pranga autorin si dhe ka sekuestruar makinën dhe 2 celularë.
Njoftimi i Policisë
U kap duke transportuar me furgon, kundrejt fitimit, emigrantë nga Pakistani, me qëllim kalimin e paligjshëm të kufirit, vihet në pranga 56-vjeçari.
Seksioni për Hetimin e Trafiqeve të Paligjshme të DVP Elbasan në bashkëpunim me shërbimet e Komisariatit të Policisë Elbasan, në vijim të punës për goditjen e aktivitetit kriminal të dhënies ndihmë shtetasve të huaj, kundrejt fitimit, për kalim të paligjshëm të kufirit, si dhe mbështetur nga inteligjenca informative, kanë finalizuar operacionin policor të koduar “Four ”, si rezultat i të cilit u arrestua në flagrancë shtetasi:
- K., 56 vjeç, banues në Korçë.
Ky shtetas u kap në flagrancë nga shërbimet e Komisariatit të Policisë Elbasan, në unazën e qytetit, Elbasan, duke transportuar me furgon, kundrejt fitimit, 4 emigrantë nga Pakistani, me qëllim kalimin e paligjshëm të kufirit.
Në cilësinë e provës materiale u sekuestruan automjeti dhe 2 celularë.
Materialet procedurale i kaluan Prokurorisë, për veprime të mëtejshme.