Çështja e mbetjeve toksike të dyshuara nga kompania KURUM që dolën përmes Portit të Durrësit ka vënë në lëvizje opozitën për të nisur përballjen me mazhorancën këtë sesion të ri.
Deputeti Agron Shehaj kërkon interpelancë në Parlament me ministren Mirela Kumbaro. Shehaj pyet ministren në lidhje me licensimin e kompanisë ‘Sokolaj’ për transportin e mbetjeve.
Ndërsa Jorida Tabaku e Gazment Bardhi thërrasin interpelancë me ministrin Petrit Malaj për tatimet për profesionet e lira.
Po ashtu, Agron Shehaj kërkon interpelancë edhe me zv. kryeministren Belinda Balluku për të kërkuar sqarime lidhur me aksin Thumanë-Kashar.
Banorët e kësaj rruge prej shumë kohësh dalin në protesta pasi thonë se nuk kanë mundësi të shkojnë në shtëpi.
Banorët e Krujës dhe Fushë Krujës protestojnë pasi rruga e re nuk është e aksesueshme prej tyre, ndaj kërkojnë hyrje dhe dalje të re për shtëpitë dhe bizneset e tyre.
Aksi Thumanë- Kashar i cili u hap më 30 qershor është një nga më të rëndësishmit e “Korridorit blu” që lidh veriun me jugun.