Reshjet e dendura të shiut, që nisën gjatë natës dhe vijuan edhe të hënën, kanë shkaktuar përmbytje në disa zona të Kosovës, me situatën më problematike të raportuar në komunën e Rahovecit.
Pamjet e publikuara nga mediat lokale dhe qytetarët tregojnë rrugë të mbuluara nga uji, ndërsa parkingu nëntokësor i qytetit është përmbytur plotësisht.
Si pasojë e motit të keq, janë përmbytur edhe sipërfaqe të konsiderueshme të tokave bujqësore, ndërsa uji ka depërtuar edhe në oborret e banesave, duke shkaktuar dëme materiale.
Autoritetet lokale bënë të ditur se ekipet emergjente kanë dalë në terren që në orët e para të mëngjesit për të përballuar situatën.
“Pas reshjeve të dendura të shiut, veçanërisht në zonën urbane të Rahovecit, ekipet e Drejtorisë së Shërbimeve Publike, në bashkëpunim me kompanitë e kontraktuara, kanë dalë menjëherë në terren për pastrimin e rrugëve, largimin e materialeve të sjella nga reshjet dhe rikthimin e qarkullimit normal”, thuhet në njoftimin e komunës.
Reshjet kanë shkaktuar probleme edhe në qarkullimin rrugor. Për një periudhë, lëvizja e automjeteve në aksin Ferizaj–Shkup u bllokua për shkak të përmbytjes së rrugës.
Vështirësi në qarkullim janë raportuar edhe në disa zona të qytetit të Gjakovës, ku reshjet intensive kanë krijuar probleme në lëvizjen e automjeteve dhe këmbësorëve.
Autoritetet u kanë bërë thirrje qytetarëve të tregojnë kujdes gjatë lëvizjes dhe të ndjekin njoftimet zyrtare deri në normalizimin e plotë të situatës.