Ukraina synon që deri në gjysmën e parë të vitit 2027 të ketë gati prototipin e sistemit të ri evropian të mbrojtjes nga raketat, të koduar “Freyja”, një projekt që synon të forcojë aftësitë mbrojtëse të vendit ndaj sulmeve me raketa balistike ruse.
Sipas Reuters, zëvendëssekretari i Këshillit të Sigurisë dhe Mbrojtjes Kombëtare të Ukrainës, Davyd Aloian, deklaroi se objektivi është ndërtimi i një prototipi funksional brenda këtij afati, i cili do të demonstrojë rezultatet e para praktike të projektit.
Aloian bëri të ditur se një komitet ndërkombëtar do të mblidhet së shpejti për të vlerësuar kostot e kërkimit dhe zhvillimit, ndërsa në këtë nismë janë angazhuar disa vende evropiane dhe kompani të industrisë së mbrojtjes.
Aktualisht, Ukraina mbështetet kryesisht te sistemet amerikane Patriot, të cilat konsiderohen si mjeti më efektiv në arsenalin e saj për interceptimin e raketave balistike ruse. Megjithatë, furnizimi me këto sisteme është kufizuar për shkak të mungesës së stokut dhe kohës së gjatë të prodhimit.
Në kuadër të projektit “Freyja”, Kievi pritet të kontribuojë me teknologjitë e veta, përfshirë një raketë lëshuese dhe një raketë interceptuese, ndërsa partnerët evropianë do të ofrojnë ekspertizë në zhvillimin e radarëve, sensorëve dhe sistemeve të drejtimit.
Në projekt marrin pjesë edhe kompani të njohura të industrisë së mbrojtjes, si Eurosam, Leonardo, Thales dhe Saab, të cilat do të kontribuojnë në zhvillimin e teknologjive të avancuara për sistemin e ri të mbrojtjes ajrore.