Një operacion i gjerë kërkimi është shtrirë në të gjithë Berlinin pas sulmit gjatë aktivitetit të Krenarisë LGBTQ+ në qendër të kryeqytetit gjerman, ku një person humbi jetën dhe 16 të tjerë mbetën të plagosur.
Policia e Berlinit ka identifikuar si të dyshuar një 21-vjeçar me emrin Abdul B., i cili ende nuk është arrestuar. Autoritetet bëjnë të ditur se ai konsiderohet person i rrezikshëm dhe mund të jetë i armatosur, ndaj qytetarëve u është kërkuar të mos i afrohen.
Sipas përshkrimit të policisë, i dyshuari është rreth 1.90 metra i gjatë, me trup të dobët dhe flokë të zinj. Në momentin e fundit që është parë, ai dyshohet se mbante një bluzë të zezë me kapuç dhe pantallona të bardha.
Autoritetet dyshojnë se Abdul B. është personi që drejtoi një automjet drejt turmës në zonën e parkut Tiergarten, rreth orës 22:00 të së shtunës, duke goditur disa pjesëmarrës të aktivitetit. Pas ngjarjes, automjeti u përplas me një pemë dhe u gjet i braktisur brenda parkut.
Policia ka ngritur një operacion të gjerë kërkimi, duke përdorur mjete ajrore, kamera termike dhe kontrolle në zona të ndryshme të qytetit. Hetuesit po verifikojnë gjithashtu nëse persona të tjerë mund të kenë qenë të përfshirë.
Pas sulmit, aktiviteti i Krenarisë në Berlin u anulua dhe mijëra pjesëmarrës u evakuuan nga zona përmes Portës së Brandenburgut. Rreth 30 persona u trajtuan në vendngjarje për shkak të gjendjes së shokut.
Policia bëri të ditur se disa persona mund të kenë pësuar edhe plagë nga mjete prerëse, ndërsa motivi i ngjarjes ende nuk është konfirmuar zyrtarisht.
Kryebashkiaku i Berlinit, Kai Wegner, e cilësoi sulmin një goditje ndaj shoqërisë së lirë dhe të hapur, ndërsa kancelari gjerman Friedrich Merz e dënoi ngjarjen si një akt të rëndë dhe kërkoi zbardhjen e plotë të saj.
Parada e Krenarisë në Berlin, e njohur si “Christopher Street Day”, është një nga aktivitetet më të mëdha LGBTQ+ në Evropë dhe këtë vit kishte mbledhur mijëra pjesëmarrës në kryeqytetin gjerman.