Këngëtari i njohur i muzikës latine, Marc Anthony, është bërë baba për herë të tetë. Ai dhe bashkëshortja e tij, modelja Nadia Ferreira, kanë ndarë me ndjekësit lajmin e ardhjes në jetë të vajzës së tyre të dytë së bashku.
Çifti ka zbuluar se vogëlushja është quajtur Myla, ndërsa lajmin e kanë bërë publik përmes një postimi në rrjetet sociale, ku kanë ndarë edhe fotografi të të porsalindurës.
“Çfarë bekimi i madh të ndajmë me ju ardhjen në jetë të Mylës sonë të çmuar. Nuk mund ta imagjinoni dot lumturinë që ndiejmë në shtëpinë tonë”, kanë shkruar Marc Anthony dhe Nadia Ferreira.
Myla i bashkohet vëllait të saj të madh, Marcos, i cili lindi në qershor të vitit 2023.
Çifti kishte njoftuar për pritjen e fëmijës së dytë në janar të këtij viti, në përvjetorin e tretë të lidhjes së tyre. Më pas, Ferreira zbuloi gjininë e foshnjës përmes një fotografie me këpucë të vogla rozë.
Marc Anthony dhe Nadia Ferreira u martuan në janar të vitit 2023 në Miami, rreth tetë muaj pasi kishin bërë publike fejesën. Për modelen paraguajane kjo është martesa e parë, ndërsa për këngëtarin bëhet fjalë për martesën e katërt.
Me ardhjen në jetë të Mylës, Marc Anthony bëhet baba i tetë fëmijëve. Vajza e tij e madhe, Arianna, lindi në vitin 1994 nga lidhja me Debbie Rosado, ndërsa në atë periudhë ai adoptoi edhe djalin Chase.
Më vonë, nga martesa me ish-Miss Universe Dayanara Torres, ai u bë baba i dy djemve, Cristian dhe Ryan. Nga martesa e tij e njohur me Jennifer Lopez, e cila zgjati dhjetë vite, ai ka edhe binjakët Maximilian dhe Emme.
Kohët e fundit, emri i Marc Anthony është përmendur edhe pas mungesës së tij në ceremoninë e diplomimit të binjakëve. Më pas, Jennifer Lopez deklaroi në një intervistë se kishte pasur një rol të madh në rritjen e fëmijëve, duke shkaktuar reagime të shumta në rrjetet sociale.