Presidenti i Shteteve të Bashkuara, Donald Trump, shprehu vlerësim për kryeministren italiane, Giorgia Meloni, duke e cilësuar atë si “një person të mirë”, në prag të takimit të tyre në kuadër të samitit të NATO-s.
“Ajo është një person i mirë, në fakt”, tha Trump, duke iu përgjigjur pyetjeve të gazetarëve para nisjes së samitit. “Më pëlqen”, shtoi ai.
Megjithatë, presidenti amerikan kritikoi vendimin e Melonit për të mos iu bashkuar sulmit amerikano-izraelit ndaj Iranit.
“Mendoj se bëri një gabim. Ajo thjesht nuk ishte aty për ne dhe kjo nuk më pëlqeu”, u shpreh Trump.
Pas përplasjes verbale mbi këtë çështje muajin e kaluar, Trump e riktheu kritikën edhe të dielën në platformën e tij Truth Social, ku publikoi një imazh të manipuluar të Melonit, të shoqëruar me mbishkrimin: “Kërkohet urdhër mbrojtjeje”.
Qeveria italiane nuk ka reaguar publikisht ndaj postimit të presidentit amerikan.
Më herët, Trump kishte deklaruar se Meloni “po shkonte keq në Itali”, ndërsa në të njëjtën kohë e kishte cilësuar atë si “popullore”. Ai kishte pretenduar gjithashtu se kryeministrja italiane i kishte kërkuar të bënin një fotografi së bashku gjatë samitit të G7, një pretendim që nuk është konfirmuar nga pala italiane.
Deri vonë, Giorgia Meloni konsiderohej një nga aleatet më të afërta të Trumpit në Evropë.
Ndërkohë, ministri italian i Mbrojtjes, Guido Crosetto, i cili shoqëron Melonin në samitin e NATO-s, deklaroi se “gjëja thelbësore është të ruhen marrëdhëniet transatlantike”.