Një zjarr i përmasave të mëdha ka përfshirë jugun e Francës, duke detyruar autoritetet të evakuojnë mbi 10 mijë banorë, ndërsa vendi po përballet me pasojat e një vale të hershme të të nxehtit që ka prekur një pjesë të madhe të Evropës, raportoi BBC.
Urdhri për evakuim është dhënë për banorët e më shumë se një duzine qytetesh dhe fshatrash pranë vargmalit të Pirenejve, në afërsi të kufirit me Spanjën.
Vatra e zjarrit ndodhet pranë zonës Trévillach, afër qytetit Perpignan, ku flakët kanë shkrumbuar të paktën 4 600 hektarë tokë. Autoritetet paralajmërojnë se situata mbetet kritike, pasi erërat e forta favorizojnë përhapjen e shpejtë të flakëve.
Banorët e zonës kanë rrëfyer se zjarri iu është afruar banesave me shpejtësi, duke shkaktuar momente paniku dhe duke detyruar shumë familje të largohen menjëherë nga shtëpitë e tyre.
Për shkak të emergjencës, autoritetet u kanë bërë thirrje qytetarëve të shmangin zonën ku kalon edhe gara çiklistike Tour de France, në mënyrë që të mos pengohet lëvizja e mjeteve të emergjencës dhe forcave zjarrfikëse.
Në përballimin e situatës është angazhuar edhe Bashkimi Evropian, i cili ka dërguar avionë zjarrfikës nga Qipro dhe Suedia për të mbështetur operacionet në terren.
Flakët kanë prekur edhe Spanjën fqinje, ku mijëra hektarë sipërfaqe janë djegur, ndërsa qindra banorë janë evakuuar si masë sigurie.
Ndërkohë, temperaturat në disa vende të Evropës Jugore kanë kaluar 40 gradë Celsius, duke rritur ndjeshëm rrezikun për shpërthimin e zjarreve të reja. Meteorologët paralajmërojnë se, edhe pse kjo valë e të nxehtit mund të mos thyejë rekorde historike, ajo është e pazakontë për këtë periudhë të vitit dhe pritet të mbajë të lartë rrezikun e zjarreve edhe në ditët në vijim.