Shpërthimi i Ebolës në Republikën Demokratike të Kongos vijon të përkeqësohet, ndërsa numri i viktimave ka kaluar 500, sipas të dhënave më të fundit të publikuara nga Organizata Botërore e Shëndetësisë (OBSH).
Në raportin e përditësuar më 4 korrik, OBSH, duke iu referuar autoriteteve shëndetësore kongoleze, bën të ditur se deri tani janë regjistruar 506 viktima dhe 1,561 raste të konfirmuara me virusin Ebola.
Situata në Ugandën fqinje paraqitet më e kontrolluar. Deri më tani janë konfirmuar 20 raste të infektimit dhe dy viktima, çka tregon një përhapje më të kufizuar të virusit në këtë shtet.
Autoritetet e Republikës Demokratike të Kongos e shpallën zyrtarisht epideminë më 15 maj. Ky konsiderohet shpërthimi i 17-të i Ebolës në vend dhe, sipas OBSH-së, është shkaktuar nga varianti Bundibugyo, për të cilin aktualisht nuk ekziston një vaksinë apo trajtim specifik i miratuar.
Ebola është një sëmundje virale shumë e rrezikshme që shkakton ethe hemorragjike dhe transmetohet përmes kontaktit të drejtpërdrejtë me lëngjet trupore të personave të infektuar. Gjatë pesë dekadave të fundit, virusi ka shkaktuar mbi 15 mijë viktima në Afrikë.
Shpërthimi më i rëndë i regjistruar ndonjëherë në Republikën Demokratike të Kongos ishte ai i viteve 2018–2020, kur u raportuan rreth 3,500 raste të infektimit dhe afro 2,300 viktima.