Teksa grupi Volkswagen vijon zbatimin e planit të riorganizimit, që parashikon shkurtimin e rreth 31 mijë vendeve të punës, kompania ka ndërmarrë një nismë të pazakontë në një prej fabrikave të saj në Poloni, duke “punësuar” 100 dele për mirëmbajtjen e një impianti fotovoltaik.
Në vend të kositjes mekanike të barit, prodhuesi gjerman i automjeteve ka zgjedhur një zgjidhje natyrore, duke përdorur kullotjen e kontrolluar të deleve për të mbajtur nën kontroll bimësinë që rritet mes më shumë se 31 mijë paneleve diellore.
Delet, të racës autoktone polake Wielkopolska, lëvizin lirshëm në hapësirat mes moduleve fotovoltaike, duke ruajtur lartësinë e përshtatshme të barit pa nevojën e makinerive apo konsumit shtesë të karburantit. Panelet u ofrojnë njëkohësisht hije dhe mbrojtje nga temperaturat e larta dhe kushtet e pafavorshme atmosferike.
Nisma është pjesë e një projekti agrivoltaik, një model që kombinon prodhimin e energjisë së rinovueshme me aktivitetin bujqësor dhe mbrojtjen e biodiversitetit. Sipas Volkswagen, ky sistem demonstron se infrastruktura energjetike mund të ketë një rol më të gjerë sesa prodhimi i energjisë elektrike, duke krijuar përfitime edhe për mjedisin dhe komunitetet lokale.
Impianti shërben gjithashtu si terren kërkimor për një studim të Universitetit të Shkencave të Jetës në Poznań. Studiuesit po analizojnë ndikimin e sistemit agrivoltaik në mirëqenien e kafshëve, mikroklimën, cilësinë e tokës dhe zhvillimin e bimësisë, me fokus të veçantë te efekti që hija e paneleve ka në uljen e stresit termik te delet.
Qëllimi i projektit është të identifikojë mënyrat më efikase për të kombinuar prodhimin e energjisë së pastër me përdorimin bujqësor të tokës, duke maksimizuar njëkohësisht përfitimet mjedisore dhe efikasitetin operacional.