Shqipëria pritet të shënojë një tjetër hap në procesin e integrimit evropian, me mbylljen e tre kapitujve të parë të negociatave për anëtarësim në Bashkimin Evropian gjatë javës së ardhshme.
Sipas burimeve diplomatike të BE-së, të cituara nga dtt-net.com, përfaqësuesit e 27 vendeve anëtare janë duke diskutuar mbylljen e Kapitullit 25 (Shkenca dhe Kërkimi), Kapitullit 26 (Arsimi dhe Kultura) dhe Kapitullit 30 (Marrëdhëniet me Jashtë).
Në të njëjtën kohë, Mali i Zi pritet të avancojë me mbylljen e dy kapitujve të tjerë të negociatave, ndërsa Moldavia dhe Ukraina pritet të hapin nga dy kapituj të rinj në rrugën e tyre drejt anëtarësimit në BE.
Sipas të njëjtave burime, vendimet përfundimtare do të formalizohen gjatë takimeve të javës së ardhshme, me kusht që 27 shtetet anëtare të arrijnë një konsensus mbi hapat e propozuar.
Nëse miratohen, këto zhvillime do të përfaqësojnë një progres të rëndësishëm për Shqipërinë në procesin e negociatave me Bashkimin Evropian, duke reflektuar ecurinë e reformave dhe përmbushjen e kritereve në fushat përkatëse.