Ministri i Brendshëm, Besfort Lamallari, ka reaguar në rrjetet sociale pas protestës së zhvilluar këtë të enjte përpara Kuvendit, e cila u shoqërua me përplasje mes protestuesve dhe forcave të Policisë së Shtetit.
Në postimin e tij, Lamallari publikoi disa fotografi nga protesta, ku, sipas tij, shfaqet edhe kryetari i Partisë Demokratike të Mamurrasit. Duke komentuar praninë e tij, ministri shkroi: “I indinjuar për flamingot e Zvërnecit dhe kryetari i partisë së molotovarëve të Mamurrasit.”
Më tej, Lamallari shtoi se, sipas tij, protestuesit nuk kursyen as simbolet kombëtare, duke deklaruar: “Patjetër dhe simbolet kombëtare nuk i kursejnë ata që janë të gatshëm të djegin Shqipërinë për babain e tyre shpirtëror.”
Protesta para Kuvendit u shoqërua me tensione gjatë gjithë ditës. Protestuesit bllokuan dhe rrethuan hyrjet e godinës së Parlamentit, duke penguar për një periudhë daljen e deputetëve dhe ministrave pas përfundimit të seancës plenare.
Sipas Policisë së Shtetit, pas incidenteve janë shoqëruar 18 persona, ndërsa 9 efektivë policie kanë mbetur të lënduar dhe kanë marrë ndihmë mjekësore. Autoritetet raportuan se protesta u karakterizua nga përplasje të forta dhe akte dhune.