Kryeministri Edi Rama ka reaguar pas tensioneve të regjistruara gjatë protestës së zhvilluar në bulevardin “Dëshmorët e Kombit”, ku pati përplasje mes protestuesve dhe forcave të policisë.
Përmes një postimi në rrjetet sociale, kreu i qeverisë e cilësoi përshkallëzimin e protestës në dhunë si pasojë të asaj që ai e përshkroi si “bulevardi politiko-mediatik”, duke deklaruar se kalimi në dhunë fizike është e vetmja gjë që mund të prodhojë kjo qasje.
“Kalimi në dhunë fizike është e vetmja gjë që mund të prodhojë tanimë korja e zezë e dështakëzemërakëve të bulevardit politiko-mediatik të Tiranës, koleksionistëve të precedentëve kriminalë dhe duarve të huaja pas tyre”, shkroi Rama.
Kalimi në dhunë fizike është e vetmja gjë që mund të prodhojë tanimë korja e zezë e dështakëzemërakëve të bulevardit politiko-mediatik të Tiranës, koleksionistëve të precedentëve kriminalë dhe duarve të huaja pas tyre!
— Edi Rama (@ediramaal) July 2, 2026
Duhet akoma durim e pastaj i vjen radha reflektimit🦩❤️
Ai shtoi se situata kërkon ende durim, duke nënvizuar se më pas do të vijë koha për reflektim.
Protesta e zhvilluar para Kuvendit u shoqërua me incidente dhe përplasje mes protestuesve dhe forcave të rendit. Gjatë demonstratës u bllokuan hyrjet e Kuvendit, duke penguar për një periudhë daljen e deputetëve dhe ministrave pas përfundimit të seancës plenare.
Sipas të dhënave zyrtare, nga përplasjet mbetën të plagosur 15 efektivë policie dhe katër protestues, të cilët morën ndihmë mjekësore në spital.