Ministria për Evropën dhe Punët e Jashtme ka reaguar ashpër pas incidentit të regjistruar gjatë protestës së së shtunës në Tiranë, ku flamuri i Ambasadës së Shtetit të Izraelit është hequr dhe më pas përdhosur nga protestues të maskuar.
Në deklaratën zyrtare, Ministria e cilëson ngjarjen si një akt të papranueshëm, duke theksuar se nuk ka asnjë lidhje me lirinë e shprehjes apo të drejtën për protestë paqësore, por përbën shfaqje të urrejtjes dhe intolerancës.
Sipas reagimit, veprime të tilla bien ndesh me traditën shqiptare të mikpritjes, harmonisë dhe respektit ndaj tjetrit, si dhe nuk përfaqësojnë Shqipërinë dhe vlerat e shoqërisë shqiptare.
MEPJ rithekson angazhimin e plotë të Shqipërisë për mbrojtjen e misioneve diplomatike dhe simboleve të tyre, në përputhje me Konventën e Vjenës dhe të drejtën ndërkombëtare, duke nënvizuar se dhuna, intimidimi dhe gjuha e urrejtjes nuk kanë vend në një shoqëri demokratike.