Autoritetet iraniane kanë deklaruar se Ngushtica e Hormuzit mbetet e mbyllur për lundrimin detar, duke sfiduar qëndrimet e Shteteve të Bashkuara se trafiku në këtë korridor strategjik vijon normalisht.
Sipas medias shtetërore iraniane Fars News Agency, Marina e Gardës Revolucionare ka bërë të ditur se nuk do të lejojë kalimin e asnjë anijeje përmes ngushticës deri në një njoftim të dytë.
Deklarata vjen një ditë pasi Teherani pretendoi mbylljen e këtij korridori strategjik, në përgjigje të zhvillimeve në rajon. Megjithatë, autoritetet amerikane kanë kundërshtuar menjëherë këto pretendime, duke theksuar se trafiku detar vazhdon normalisht dhe nuk ka ndërprerje të lëvizjes së anijeve tregtare.
Ngushtica e Hormuzit, një nga rrugët më të rëndësishme detare në botë për transportin e naftës dhe gazit, mbetet në qendër të vëmendjes ndërkombëtare, pasi çdo tension në këtë zonë ndikon drejtpërdrejt në tregjet globale të energjisë.
Situata po ndiqet nga afër nga aktorët ndërkombëtarë, ndërsa tensionet mes Iranit, Izraelit dhe aleatëve perëndimorë vijojnë të mbeten të larta pavarësisht përpjekjeve diplomatike për de-përshkallëzim.