Shqiptaro-amerikani John Alite, ish-bashkëpunëtor i familjes mafioze Gambino crime family dhe dikur i afërt me John Gotti Jr., është arrestuar në New Jersey nga autoritetet amerikane.
Sipas raportimeve të mediave amerikane, 63-vjeçari u ndalua në orët e para të mëngjesit të së premtes në banesën e tij në Englishtown, pas një operacioni të zhvilluar nga forcat speciale SWAT.
Prokuroria e Përgjithshme e New Jersey bëri të ditur se Alite akuzohet për disa vepra penale, përfshirë zhvatje përmes kërcënimit, shkelje të ligjeve për huadhënie me interesa të paligjshme, keqmenaxhim korporativ dhe kërcënime.
Bashkë me të është arrestuar edhe Stephen Locrotondo, i cili përballet me akuza për huadhënie të paligjshme dhe komplot.
Avokati i tij ka mohuar akuzat, duke deklaruar se klienti i tij ka jetuar në mënyrë të ligjshme prej gati dy dekadash dhe se do të shpallet i pafajshëm.
Alite është një figurë e njohur në SHBA, pasi ka pranuar më herët përfshirjen në disa vrasje dhe ka bashkëpunuar me autoritetet federale, gjë që i kishte siguruar ulje të dënimit. Pas daljes nga burgu, ai ishte përfshirë në jetën publike dhe kishte shërbyer edhe në strukturat lokale të Englishtown.
Arrestimi i tij ka shkaktuar reagime të forta dhe habi në opinionin publik lokal, ndërsa autoritetet theksojnë se hetimet po vijojnë dhe prezumimi i pafajësisë mbetet në fuqi deri në përfundim të procesit gjyqësor.