Kryeministri Edi Rama deklaroi gjatë mbledhjes së grupit parlamentar të Partisë Socialiste se rrjetet sociale dhe algoritmet po ndryshojnë mënyrën se si zhvillohet debati publik dhe protestat në shoqërinë moderne.
Duke iu referuar zhvillimeve të fundit politike dhe debateve për investimet në Zvërnec, Rama tha se protestat e ditëve të sotme nuk zhvillohen më në sheshe tradicionale, por në një “shesh” të ri, të krijuar për algoritmet e platformave digjitale.
Sipas tij, studiot televizive janë kthyer në hapësira ku prodhohet përmbajtja që ushqen algoritmet dhe rrit përhapjen e mesazheve në rrjetet sociale.
Kryeministri argumentoi se sfida e kohës nuk lidhet më me ndarjen mes së majtës dhe së djathtës, por me përplasjen mes politikës që synon t’u shërbejë qytetarëve dhe logjikës së algoritmeve që favorizon konfliktin dhe vëmendjen.
Rama tha se shekulli XXI po krijon një klasë të re shoqërore, të cilën e quajti “proletariati i algoritmit”, njerëz që bashkohen jo nga puna apo profesioni, por nga ekrani i telefonit dhe dëshira për dukshmëri.
Ai theksoi se demokracia nuk nënkupton që çdo opinion ka të njëjtën peshë në çdo çështje dhe se liria e fjalës nuk zëvendëson dijen, provën dhe kompetencën.
“Demokracia po përballet me njeriun që nuk ka krijuar kurrë asgjë, nuk ka asnjë shkollë dhe asnjë kompetencë për të folur mbi atë që vendos të flasë”, u shpreh Rama.
Sipas kryeministrit, algoritmet nuk njohin përgjegjësi, por vetëm vëmendjen, duke nxitur përmbajtje gjithnjë e më konfliktuale. Ai paralajmëroi se në epokën e rrjeteve sociale, emocionet, britmat dhe shpifjet përhapen më shpejt se argumentet dhe faktet.
Rama shtoi se shumë individë përfshihen në debate politike apo protesta jo sepse kanë diçka konkrete për të kontribuar, por sepse ndjekin trendet dhe kanë frikë të mbeten jashtë vëmendjes që krijojnë platformat sociale.