Kryeministri i Izraelit, Benjamin Netanyahu, ka thirrur për mbrëmjen e së dielës një mbledhje të kabinetit të sigurisë, pas zhvillimeve të fundit në bisedimet mes Shteteve të Bashkuara dhe Iranit.
Vendimi vjen pasi presidenti amerikan, Donald Trump, deklaroi se Uashingtoni dhe Teherani do të vazhdojnë procesin drejt arritjes së një memorandumi mirëkuptimi, duke sinjalizuar progres në negociatat mes dy vendeve.
Sipas mediave izraelite, zyrtarë të lartë në Tel Aviv kanë shprehur shqetësim për përmbajtjen e mundshme të marrëveshjes, duke vlerësuar se disa nga pikat e saj mund të ndikojnë në interesat strategjike dhe sigurinë kombëtare të Izraelit.
Raportimet mediatike pretendojnë se gjatë negociatave SHBA-ja ka treguar gatishmëri për të pranuar disa kërkesa të rëndësishme të Iranit, çka ka shtuar debatet dhe rezervat brenda establishmentit izraelit.
Megjithatë, deri tani as autoritetet amerikane dhe as ato iraniane nuk kanë bërë publike detajet e memorandumit që po diskutohet, ndërsa vëmendja mbetet e përqendruar te hapat e ardhshëm të procesit diplomatik dhe ndikimi i tij në sigurinë e Lindjes së Mesme.