Presidenti i Serbisë, Aleksandar Vuçiç, ka deklaruar se planifikon të japë dorëheqjen nga posti i tij brenda tre deri në katër muaj, duke lënë të hapur mundësinë që largimi të ndodhë edhe më herët.
Deklarata u bë gjatë një interviste për Radio Beograd, raporton N1.rs, ku Vuçiç u shpreh se po përgatitet gradualisht për largimin nga zyra presidenciale.
“Kam filluar të paketoj librat në Presidencë. Kam shumë libra dhe po mendoj ku t’i vendos”, tha ai, duke lënë të kuptohet se procesi i tranzicionit mund të jetë në përgatitje.
Duke folur për zgjedhjet e mundshme të parakohshme, presidenti serb theksoi se ato pritet të mbahen brenda pak muajve dhe se nuk dëshiron të flasë për shkurtim mandati, por për dorëheqje të plotë nga detyra.
Vuçiç shtoi gjithashtu se po shqyrton mundësinë e kandidimit për postin e kryeministrit, ndërsa theksoi se vendime të rëndësishme politike pritet të merren në periudhën në vijim.
Presidenti serb ka përmendur edhe më herët mundësinë e largimit nga detyra para përfundimit të mandatit të tij, përfshirë një deklaratë në muajin maj, kur tha se në rast dorëheqjeje Kushtetuta e Serbisë parashikon mbajtjen e zgjedhjeve presidenciale brenda 90 ditëve.