Gjykata e Posaçme për Korrupsionin dhe Krimin e Organizuar (GJKKO) ka shpallur fajtor Erio Zejnon për përfshirje në organizimin e atentateve ndaj Ervis Matodashajt dhe Inez Hajrullës, duke e dënuar me 7 vite e 4 muaj burg.
Sipas vendimit të gjykatës, Erio Zejno u akuzua për disa vepra penale, përfshirë “sigurimin e kushteve dhe mjeteve materiale për të kryer vrasje”, “mbajtje pa leje dhe prodhim armësh e municionesh” si dhe “pjesëmarrje në grup të strukturuar kriminal”.
Prokuroria e Posaçme kundër Korrupsionit dhe Krimit të Organizuar (SPAK) kishte paraqitur kërkesën për gjykim, duke e lidhur të pandehurin me veprimtari kriminale të organizuar në bashkëpunim me persona të tjerë.
Sipas dosjes hetimore, veprat penale janë kryer në kuadër të një grupi të strukturuar kriminal dhe kanë pasur si objektiv organizimin e atentateve ndaj dy shtetasve të njohur me inicialet E.M. dhe I.H.
Gjykimi i çështjes është zhvilluar me procedurë të shkurtuar, ndërsa trupi gjykues ka vendosur fillimisht një dënim total prej 11 vitesh burgim, i cili më pas është ulur me 1/3 për shkak të gjykimit të shkurtuar, duke u finalizuar në 7 vite e 4 muaj burg.
Vendimi parashikon gjithashtu që vuajtja e dënimit të kryhet në një burg të sigurisë së lartë, ndërsa shpenzimet procedurale i ngarkohen të pandehurit.
Vendimi mund të ankimohet brenda 15 ditëve në Gjykatën e Posaçme të Apelit për Korrupsionin dhe Krimin e Organizuar.