Kryeministri britanik Keir Starmer ka akuzuar miliarderin e teknologjisë Elon Musk se po kontribuon në përçarjen e shoqërisë britanike, pas reagimeve të tij publike lidhur me vrasjen e 18-vjeçarit Henry Nowak.
Ngjarja ka shkaktuar protesta të dhunshme në Southampton, pas publikimit të pamjeve nga kamerat e trupit të policisë, të cilat tregojnë momentet e fundit të jetës së Nowak. Autori i dyshuar i vrasjes, Vickrum Digwa, kishte pretenduar më herët se ishte viktimë e një sulmi racist.
Elon Musk ka reaguar në platformën X, duke kritikuar mënyrën se si policia e ka trajtuar rastin dhe duke u bërë thirrje përdoruesve të shpërndanin videon e ngjarjes. Ai ka pretenduar se autoritetet kanë vepruar padrejtësisht ndaj adoleshentit dhe kanë treguar favorizim ndaj vrasësit të dyshuar.
Musk gjithashtu ka akuzuar mediat tradicionale për heshtje selektive, duke e krahasuar këtë rast me mbulimin e gjerë mediatik të vrasjes së George Floyd në SHBA.
Gjatë një vizite në York, Starmer deklaroi se ndërhyrjet e Musk në diskursin publik britanik po synojnë të krijojnë ndasi dhe tensione sociale. Ai theksoi se familja e Henry Nowak ka bërë thirrje për qetësi dhe maturi.
“Kur përballemi me një tragjedi të tillë, ne duhet të reagojmë me qetësi dhe dinjitet, ashtu siç ka kërkuar familja e Henry-t”, u shpreh kryeministri britanik.
Ndërkohë, liderja e Partisë Konservatore, Kemi Badenoch, ka bërë thirrje për bashkëpunim ndërpartiak për të rikthyer besimin e publikut te policia. Ajo është takuar me familjarët e Nowak, njësoj si edhe Starmer në Downing Street.
Familjarët e Henry Nowak – nëna, babai dhe njerka e tij – kanë marrë pjesë në takime me autoritetet, por nuk kanë bërë ende deklarata publike mbi përmbajtjen e bisedimeve.