Departamenti i Shtetit i SHBA-së ka njoftuar zgjerimin e politikës së kufizimeve për vizat, duke paralajmëruar masa më të ashpra ndaj individëve që veprojnë në emër të kundërshtarëve të Shtetet e Bashkuara të Amerikës.
Njoftimi është shpërndarë edhe nga Ambasada e SHBA-së në Tiranë, e cila theksoi se masat synojnë persona që punojnë për të minuar interesat amerikane, duke paralajmëruar se ata dhe familjarët e tyre mund të shpallen të papërshtatshëm për hyrje në SHBA.
Sipas raportimeve, janë ndërmarrë hapa për vendosjen e kufizimeve ndaj 26 individëve, megjithëse identiteti dhe aktivitetet e tyre nuk janë bërë publike.
Aktivitetet që mund të çojnë në kufizim vizash përfshijnë: ndihmën ndaj fuqive kundërshtare për të kontrolluar burime strategjike, destabilizimin e sigurisë rajonale, minimin e interesave ekonomike amerikane dhe operacione ndikimi që cenojnë stabilitetin e vendeve në hemisferën perëndimore.
Presidenti Donald Trump ka mbështetur një qasje më të fortë në politikën e jashtme, të lidhur me të ashtuquajturën “Doktrina Monroe”, e frymëzuar nga vizioni i ish-presidentit James Monroe.
Këto masa mbështeten në Aktin e Imigracionit dhe Kombësisë, i cili i jep të drejtë Sekretarit të Shtetit të kufizojë hyrjen e shtetasve të huaj kur konsiderohet se mund të ketë pasoja negative për politikën e jashtme të SHBA-së.