Një kontejner me mallra të bllokuara nga Dogana e Durrës është dërguar gabimisht në Pire, duke hapur një hetim për rrethanat e ngjarjes.
Bëhet fjalë për rreth 100 kg mallra, kryesisht atlete, pantallona dhe kufje, të cilat ishin sekuestruar nga dogana për verifikim, pasi dyshohej nëse ishin produkte origjinale apo imitime. Mallrat ishin vendosur në një kontejner bosh, në pritje të vendimmarrjes nga autoritetet përkatëse.
Sipas burimeve doganore, më 9 prill është konstatuar mungesa e kontejnerit në sheshin e depozitimit, duke nisur menjëherë verifikimet për vendndodhjen e tij. Më pas është zbuluar se agjencia e transportit detar e kishte nisur gabimisht drejt Greqisë, duke e konsideruar si kontenier bosh.
Pas konstatimit të gabimit, kontejneri është rikthyer në Shqipëri dhe pritet të hapet në prani të Prokuroria e Durrësit dhe Hetimit Doganor, për të verifikuar saktësisht përmbajtjen dhe gjendjen e mallrave.
Autoritetet kanë nisur hetimet për të sqaruar përgjegjësitë dhe për të zbardhur se si ndodhi ngatërrimi në transportin e kontejnerit.